हिमायतनगर नगरपरिषद निवडणूक : सध्यातरी युतीचे गुऱ्हाळ फिसकटले

हिमायतनगर नगरपरिषद निवडणूक : सध्यातरी युतीचे गुऱ्हाळ फिसकटले

नगराध्यक्ष पदासाठी 21 तर नगरसेवकपदासाठी 189 अर्ज; तरुणाईचा जोश, तहसील कार्यालयात मेळाव्याचे वातावरण!**

नऊ वर्षाच्या प्रतीक्षेनंतर आला नगरपंचायत निवडणुकीचा योग

हिमायतनगर (ता. वा 17 नोव्हेंबर) — नऊ वर्षांच्या प्रतिक्षेनंतर येणाऱ्या नगरपरिषद निवडणुकीत हिमायतनगरचे राजकारण अक्षरशः पेटले आहे. कडाक्याची थंडी असतानाही तहसील कार्यालयासमोर उमेदवार, कार्यकर्ते, समर्थक यांची जबरदस्त गर्दी झाली आणि वातावरण निवडणूक जत्रेचे रूप घेऊन तुफान गडबडजनक दृश्य निर्माण झाले.

शेवटच्या दिवशी काँग्रेसने माजी आमदार माधवराव पाटील यांच्या नेतृत्वाखाली नगराध्यक्ष पदासह 17 प्रभागांतील उमेदवारांचे अर्ज एकसाथ दाखल करून शक्तीप्रदर्शन केले. त्यानंतर भाजप, शिंदेसेना, उबाठा, राष्ट्रवादी – अजित पवार गट, राष्ट्रवादी – शरद पवार गट, वंचित बहुजन आघाडी आदी पक्षांनी आपली उमेदवारी दाखल करताच साऱ्या परिसरात उत्साह, घोषणाबाजी, रांगा आणि वातावरणात ठिणग्या उडाल्या.

**महाविकास आघाडी आणि महायुतीची युती कोसळली

‘नगराध्यक्ष पद कोणाला?’ या प्रश्नावरच सर्व काही अडकले**

दोन्ही प्रमुख आघाड्यांमध्ये (महा.वि.आ. आणि महायुती) मागील काही दिवसांपासून जोरदार सुतोवाच सुरू होते. मात्र नगराध्यक्ष पदाचा तिढा सुटला नाही.

प्रत्येक पक्षाने “पहिला हक्क आमचा!” अशी भूमिका घेतल्याने

युतीची जहाजे तटापर्यंत पोहोचण्याआधीच धडाधड बुडाली.

स्थानिक पातळीवरूनच समजते की अनेक पक्षांचे नेते—

नगराध्यक्ष पद न सोडणे, प्रभागांचे अवाजवी वाटप, गटांतर्गत नाराजी, तरुणांचे बंड —

या कारणांमुळे दोन्ही आघाड्यांचे सूत्र पूर्णपणे हातातून साध्यतरी सुटले.

युती सध्यातरी फिसकटल्यामुळे सर्वच पक्ष स्वतंत्र लढत देणार याचे चित्र आहे. त्यामुळे येथील निवडणूक सरळ-द्विपक्षीय न राहता ते बहुरंगीं होणार हे निश्चित.

नगराध्यक्ष पदासाठी सहा प्रमुख चेहरे — 21 अर्जांची रांग

नगराध्यक्ष पदासाठी सर्व प्रमुख पक्षांचे उमेदवार खालीलप्रमाणे आहेत:

काँग्रेस: शेख रफिक शेख महेबूब

भाजप: डॉ. राजेंद्र वानखेडे

शिंदेसेना: रामभाऊ ठाकरे

राष्ट्रवादी (अजित पवार गट): मो. जावेद अ. गणी

राष्ट्रवादी (शरद पवार गट): सरदारखान खलीलखान पठाण

उद्धव ठाकरे गट: चंद्रकला परमेश्वर गुड्डटवार

याशिवाय काही स्वतंत्र इच्छुकांनीही अर्ज भरल्याने नगराध्यक्ष पदासाठी एकूण 21 उमेदवारी अर्ज दाखल झाले आहेत.

ही बहुकोनी स्थितीत मतदानाचा कोन, जातीय–घटक समीकरणे आणि बुथनिहाय मतविभाजन अधिक गुंतागुंतीचे करणार आहे.

नगरसेवक पदासाठी तब्बल 189 उमेदवार — राजकीय रणधुमाळीला सुरुवात

नगरसेवक पदासाठी 17 प्रभागांमधून एकूण 189 उमेदवारी अर्ज दाखल झाले आहेत.

अनेक प्रभागांत 8 ते 10 उमेदवारांपर्यंत चुरस दिसत आहे.

तरुणाईचा मोठा ओघ

महिला उमेदवारांचा उत्साह

जातीय व सामाजिक समिकरणांतील चढउतार

स्थानिक मुद्द्यांवरील लोकाभिमुख अजेंडा

या सर्व घटकांचा परिणाम या निवडणुकीवर मोठ्या प्रमाणात होणार आहे.

“अभी नहीं तो कभी नहीं” — तरुणांचा जोश उसळला

नऊ वर्षांनंतरची ही निवडणूक असल्याने तरुण उमेदवारांनी मोठ्या प्रमाणात रिंगणात उडी घेतली आहे.

तहसील कार्यालयात तरुण कार्यकर्त्यांची घोषणाबाजी, सोशल मीडिया लाइव्ह, फोटोग्राफी आणि उत्साहपूर्ण वातावरण विशेष ठरले.

अनेकांनी ‘दोहेरी’ रणनीती — पक्ष व अपक्ष दोन्ही अर्ज भरून सुरक्षित खेळी केली.

पक्षांतर्गत तिकीट मिळण्यात अनिश्चितता असल्याने मोठ्या संख्येने उमेदवारांनी

अपक्ष + पक्ष असे दोन्ही अर्ज भरले आहेत.

काहीजणांना पक्षाचे तिकीट न मिळाल्यास ‘स्वतंत्र’ म्हणून स्पर्धेत उतरायचे नियोजन आधीपासूनच करून ठेवले आहे.

यामुळे प्रभागनिहाय मतविभाजन अधिक गुंतागुंतीचे होणार आहे.

युतीचा गोंधळ ‘फॉर्म रिटर्न’पर्यंत सुरू राहणार — 21 नोव्हेंबर निर्णायक

अनेक पक्षीय नेत्यांना माहिती आहे की युतीशिवाय निवडून येणे कठीण, परंतु नगराध्यक्ष पदाचा तिढा सुटेपर्यंत कोणतीच आघाडी निर्माण होत नाही. त्यामुळे फॉर्म मागे घेतले जाण्याच्या शेवटच्या दिवसापर्यंत म्हणजेच 21 नोव्हेंबर सायं. 5 वाजेपर्यंत युतीचे गुऱ्हाळ सुरूच राहील.

निवडणूक विभागाच्या माहितीनुसार, अर्जांची छाननी व त्यानंतर फॉर्म रिटर्नच्या दिवसापर्यंत संपूर्ण राजकीय चित्राची दिशा स्पष्ट होणार आहे.