सरकारचा फॉर्म्युला ठरला; शिवसेनेचे १३, राष्ट्रवादीचे १२ तर काँग्रेसचे ११ पालकमंत्री अशा प्रकारे.

मुंबई :- महाविकास आघाडीच्या खातेवाटपाचा तिढा सुटला असून, पालकमंत्र्यांचा फॉर्म्युलाही ठरल्याची माहिती पुढे आली आहे. आज दुपारनंतर हा फॉर्म्युला जाहीर होण्याची शक्यता आहे. काल दीर्घ काळ चाललेल्या चर्चेनंतर शिवसेनेच्या कोट्यातून काँग्रेसला सांस्कृतिक कार्य, बंदरे आणि खार भूमी विकास तर राष्ट्रवादी काँग्रेस युवक कल्याण आणि क्रीडा ही खाती देण्यात येणार आहे. तर ज्या जिल्ह्यात ज्या पक्षाचे आमदार जास्त असतील त्यांना त्या जिल्ह्याचं पालकमंत्रिपद मिळणार आहे.

ठरलेल्या फॉर्म्युल्यानुसार १३ जिल्ह्यांचे पालकमंत्रिपद शिवसेनेकडे, राष्ट्रवादीकडे १२ तर काँग्रेसकडे ११ जिल्ह्यांचं पालकमंत्रिपद असणार आहे. पालकमंत्रिपदासाठी तीन ते चार जिल्ह्यावर तीनही पक्षांनी दावा ठोकलाय, त्याबाबत मुख्यमंत्री यांनी निर्णय घ्यावा, असा निर्णय बैठकीत घेण्यात आला आहे.

याशिवाय काँग्रेस, राष्ट्रवादीला आणखी एक खातं हवं आहे. मात्र त्याबाबत सर्वस्वी निर्णय मुख्यमंत्र्यांनी घ्यावा, आता चर्चा होणार नाही, अशी तीनही पक्षांनी भूमिका घेतली आहे. महाविकास आघाडीच्या तिन्ही पक्षांतील मंत्र्यांच्या खातेवाटपाची यादी तयार असून, दुपारनंतर दोन्ही पक्ष मुख्यमंत्र्यांकडे यादी सादर करणार आहेत. त्यानंतर मुख्यमंत्र्यांच्या अंतिम निर्णयानंतर खातेवाटप जाहीर होण्याची शक्यता  आहे.